翠華Concept (旺角篇)

位於女人街頭的「翠華Concept」早排裝修，原以為在地下一層增添座位，但原來新增麵包專櫃。

相對其他翠華的麵包檔，此間無論位置或供應數量都較少；不過麵包由檔後的工場製造，早上返工時可以買到新鮮出爐的麵包。

專程用三個早上到「翠華Concept」買麵包，分別試了叉燒包，雪山奶皇包，及墨西哥奶皇包。

叉燒包 - 典型的size，不過價錢卻貴得有點嚇人，$10/個。包外型不錯，面層已焗至深啡色；咬落可見叉燒粒，份量算多，有肥膏但數量可以接受。餡料甜度適中，口感豐富，好食！不過價錢$10個人覺得仍然偏貴。

雪山奶皇包和墨西哥奶皇包基本上餡料一樣，只是外層一個佈滿糖霜，一個墨西哥面。個人一向鍾情墨西哥包，這次碰巧剛剛出爐，雖然外皮勁油，但入口脆脆口味感豐富好食！內裡則藏滿奶皇餡，奶皇本身的甜度OK，不過加上墨西哥外層後略為偏甜。其實個人覺得無餡的墨西哥包反而更好食，現在感覺有點膩。兩款皆為$6/個，可以接受。

三款包味道OK的，但又未到必食不可地步，尤其叉燒包，這個價錢還有很多選擇。